Programa de Recuperación Patrimonial no Monte Aloia 2016

Escrito por: O Castro d’Aceiro

Cando vin eu por vez primeira esa «Muralla Cilópea» quedei abraiado totalmente. Trátase dunha muralla enorme, hai quen fala de 3200 metros de lonxitude, todo ao redor da cima do monte Aloia. De ser certo, sería a segunda muralla conservada máis grande de Galicia, despois da de Lugo, que non é pouco. Pero… Que gardaba no seu interior? As penedías acochan unha área de 30 hectáreas ou máis, nos que hai unha curiosa capela de San Xián consagrada a un suposto eremita do monte. Tamén está, próxima, a Cama de San Xulián, unha pedra cunha cavidade na base e plana na zona superior.

Historicamente o monte Aloia refuxiou ás xentes da comarca de Tui das numerosas invasións que viviron, pero ¿quen podía defender un perímetro de 3200 metros? Ninguén. Non hai constancia de ningún exército en Galicia con capacidade para artellar unha defensa nunha muralla de tres quilómetros. Entón, para que valía?, De que época é? Parece que non é castrexa. Din que podería ser tardorromana ou altomedieval. ¿Algo máis? Nada.

A min, ocórreseme que Castro Valente está nas proximidades de Iria Flavia, un importante enclave romano e do adxacente porto de Cesuris; o Monte Aloia sobre Tide, outra destacada urbe romana con porto. Nos dous casos temos dous dos xacementos máis enigmáticos e espectaculares de Galicia. Murallas de pedra que cercan extensións enormes.

Qué gran historia hai aquí detrás, qué gran historia que descoñecemos e… haberá en Galicia máis recintos enormes como Castro Valente e o Monte Aloia?